Kåfjordhallen gievrudanlanja boahttevaš atnu

Suohkanstivra mearridii geassemánu-čoahkkimis áššis 58/21 ođđa njuolggadusaid Kåfjordhallena gievrudanlanja atnui. Deaŧalaš rievdadeapmi lea ahte dál sáhttet vel eanebut atnit gievrudanlanja fálaldagaid, go dál ožžot lanja atnit maiddái 1) suohkana bargit gitta dii. 17.00 rádjái juohke beaivve, 2) eará ovttaskas olbmot badjel 16 jagi geat mákset miellahttuvuođa muhtimii suohkana valáštallanservviin. Maiddái 13-15 jahkásaš nuorat sáhttet atnit hárjehallanlanja jus váhnemat leat čálalaččat miehtan dasa sierra skovi bokte ja jus hárjehallanlanjas leat unnimusat guokte olbmo.

Juohke valáštallansearvi suohkanis oažžu 10 koda-čoavdaga maiguin beassá Kåfjordhallenii. Lea valáštallanservviid iežaset ovddasvástádus juohkit/luoikat daid siskkáldasat iežaset searvvis ja atnit daid áimmuin, muhto searvvit sáhttet oažžut eanet koda-čoavdagiid jus čájehuvvo ahte lea dárbbašlaš.

Buot geavaheaddjit fertejit deavdit iešjulggašteami skovi. Dat dahkko elektrovnnalaččat, ja vuolláičállojuvvo/signerejuvvo elektrovnnalaččat. Buohkat geat háliidit atnit gievrudanlanja fertejit čállit deike post@kafjord.kommune.no ja merket e-poastta: egenerklæring Kåfjordhallen. E-poasttas galget leat dát dieđut su birra gii áigu atnit hárjehallanlanja: namma, ahki, adreassa, telefonnummar ja valáštallansearvi. De oažžu elektrovnnalaš reivve, man ferte rahpat, ja dasto vuolláičállit elektrovnnalaččat. Dasto oažžu suohkan dán vuolláičállojuvvon reivve. Valáštallansearvi ii sáhte luoikat koda-čoavdaga olbmuide geat eai leat deavdán dán skovi!

13-15 jahkásaš nuoraide guoská seamma prinsihppa váhnemiid miehtama skovi hárrái. Váhnen/fuolaheaddji ferte vuos čállit deike post@kafjord.kommune.no ja merket e-poastta: Foreldresamtykke Kåfjordhallen. E-poasttas galgá boahtit ovdan geasa miehtan guoská ja čuovvovaš dieđut: nuora namma, nuora riegádanbeaivi, adreassa, nuora telefonnummar ja e-poasta, ja váhnema/fuolaheaddji namma. De sáddejuvvo váhnenmiehtanskovvi, man váhnen/fuolaheaddji ferte rahpat, ja dasto vuolláičállit/signeret elektrovnnalaččat. Easkka de beassá nuorra boahtit givrodathárjehallanlatnjii. Valáštallansearvvit eai sáhte luoikat koda-čoavdaga nuoraide jus váhnemat/fuolaheaddjit eai leat deavdán ja signeren skovi.   

Mii muittuhit ahte organiserejuvvon hárjehallan manná álo earáid ovdalii. Dat mearkkaša ahte ovttaskas olbmot, ležžet dál suohkanbargit dahje valáštallanservviid miellahtut, ožžot atnit gievrudanlanja dušše dalle go doppe ii leat organiserejuvvon hárjehallan.

Valáštallansearvvit fertejit ohcat hárjehallanáiggiid seamma ládje go muđui ohcet áiggi Kåfjordhallenii, ja sihke hálla ja givrodathárjehallanlanja juolluduvvon áiggiid diibmoplána almmuhuvvo ovdal golggotmánu 1. beaivvi Gáivuona suohkana ruovttusiidduin. Geahča dáppe eanet: https://www.kafjord.kommune.no/treningstider-i-kaafjordhallen-for-2021.6361286-433741.html 

Kåfjordhallena givrodathárjehallanlanja atnima ođđa njuolggadusat 01.10.2021 rájes:

1. Valáštallansearvvit ja organisašuvnnat mat lágidit fysalaš aktivitehtaid Gáivuonas sáhttet ohcat hárjehallanáiggiid givrodathárjehallanlanjas. Givrodathárjehallan servviid/joavkkuid olis galgá vuoruhuvvot ovdalii ovttaskas olbmuid ja organiserekeahtes hárjehallama.   

2. Hárjehallanáiggit givrodathárjehallanlanjas sáhttet ohccojuvvot seamma ládje go muđui ohcá hállas áiggi. Geahča suohkana ruovttusiiddus sierra njuolggadusaid hárjehallanáiggiid ohcamii hállas.   

3. Gáivuona suohkan sáhttá ieš mearridit hárjehallandivadiid lanja geavaheamis. Seamma  ládje sáhttet valáštallansearvvit ieža mearridit hárjehallandivadiid iežaset miellahtuide.  

4. Gievrudanhárjehallanlanja geavaheami ahkemearri lea 16 jagi, muhto 13-15 jahkásaš nuorat sáhttet čuldojuvvot dien mearrádusas jus leat unnimusat guokte olbmo hárjehallanlanjas ja jus sis lea váhnema/fuolaheaddji vuolláičála dasa ahte son oažžu hárjehallat givrodathárjehallanlanjas.   

5. Ovttaskas olbmot sáhttet, jus leat miellahttun suohkanii gullii valáštallansearvvis ja mákset vejolaš hárjehallandivada, hárjehallat givrodathárjehallanlanjas dalle go doppe ii leat organiserejuvvon hárjehallan mii lea almmuhuvvon diibmoplánas.    

6. Suohkanbargit sáhttet hárjehallat doppe diibmu 17 rádjái.  

7. Givrodathárjehallanlanjas ii leat bearráigeahčču, ja danne lea buot hárjehallan juohkehačča iežas ovddasvástádus. Gáivuona suohkanis ii leat makkárge ovddasvástádus rusttegiid boasttugeavaheami oktavuođas, dahje vahágiid/bárttiid dáfus mat sáhttet geavvat rusttegiid geavaheami oktavuođas.  

8. Buot geavaheddjiin lea ovddasvástádus oahppat hárjehallanrusttegiid geavaheami, ja fertejit dohkkehit 7. čuoggá dan bokte ahte vuolláičállet/signerejit geavaheaddjesoahpamuša (iešjulggaštusa). 13-15 jahkásaš nuorat fertejit dasa lassin háhkat váhnemis/fuolaheaddjis vuolláičállojuvvon/signerejuvvon mieđihanskovi, gč. 4. čuoggá.    

9. Geavahansoahpamuš lea persovnnalaš ja dan ii sáhte addit earáide. Galgá dieđihuvvot suohkana bálvaluskantuvrii jus givrodathárjehallanlanja geavahit dakkárat geat eai leat vuolláičállán/signeren geavahansoahpamuša.    

10. Váldde vuhtii eará geavaheddjiid – ane sihkaldaga go hárjehalat. Go leat geargan de galggat buhtistit hárjehallanrusttegiid desinfiserenávdnasiin ja báhpiriin. 

11. Givrodathárjehallanlanjas ii leat lohpi atnit olgoskuovaid.   

12. Geavaheaddjit galget doallat lanja čorgadin. Rusttegiid galgá bidjat sadjái go lea geargan.   

13. Suohkanis ii leat ovddasvástádus persovnnalaš árvodávviriid dahje eará biergasiid hárrái. 

14. Vistti eaiggát fuolaha áigges áigái bearráigeahču máŧasdoallama ja divodemiid hárrái. Suohkan bearráigeahččá maiddái hárjehallanrusttegiid ja lanjaid ortnegis doallamii ja buhtisteapmái. 

15. Váilevuođat dieđihuvvojit viessohoaiddárii dahje vistti hálddašeaddjái.  

16. Buohkat geat atnet givrodathárjehallanlanja leat geatnegasat diehtit ja čuovvut daid njuolggadusaid mat áigges áigái gustojit lanja geavaheapmái.