Servodatdorvvu barggus lea dehálaš ahte suohkanis lea buorre ipmárdus sierranas dilálašvuođain. Min lea dárbu oaidnit mii sáhttá dáhpáhuvvat, árvvoštallat maid dat sáhttá váikkuhit ja válmmastit doaibmabijuid mat geahpedit vahágiid. Suohkana gearggusvuođadoaimmain lea risikoguorahallan, gearggusvuođaplána, dieđihanvuogádat ja hárjehallamat guovddážis.
Ođđa plánen- ja huksenláhka maid geatnegahttá suohkaniid ovddidit areála- ja regulerenplánabargguin servodatsihkkarvuođa. Válmmašvuođa barggu deháleamos prinsihpat leat, nugo 
dás boahtá ovdan, ovddasvástádus, lagasvuohta, ovttalágánvuohta ja ovttasdoaibman. Dat mearkkaša ahte sus/sis geas/geain lea ovddasvástádus dábálaš dilálašvuođas lea maid ovddasvástádus erenomáš dáhpáhusain/ roasuin, ja lea maid dehálaš doalahit seammalágán organiserema roasuid gieđahallamis go dábálaš dilis. Gáivuona suohkan ja iežá servodatdoaibmit, nugo Fylkamánni ja NVE, sáhttet ovttasdoaibmama vuođđojurdaga vuođul ráhkkanit buoragit, ja dakko bokte unnidit sávakeahtes dáhpáhusaid váikkuhusaid.
Jus leat stuora roasut vai heahtedilit sáhttá ságadoalli/ráđđeolmmái mearridit ahte suohkana heahtejođihanjoavku, ollis dahje oassi doaibmagoahtá. Heahtejođihanjovkui gullet ságadoalli/várre ságadoalli, ráđđeolmmái, veahkkeráđđeolmmái, bálvaluskontuvrra jođiheaddji, suohkanhoavda dearvvašvuođa- ja fuola, suohkanhoavda bajasšáddan, suohkanhoavda doaimmaid ja ovddideami ja vel gearggusvuođa bagadeaddji. Gáivuona suohkana gearggusvuođajoavkku jođiha ráđđeolmmái, ja sátnejođiheaddji ovddasvástádus lea addit dieđuid suohkana orruide/bargiide, doallat aktavuođa mediai ja searvat čoahkkimiidda iežá servodatdoaibmiiguin.
