Ráđđehus lea dál ovdanbuktán ođđa riikaviidosaš doaimmaid mat gustojit ođđajagemánu vuosttáš beaivvi rájes. Dál álggus geahpeduvvojit doaimmat mánáide ja nuoraide vuollel 20 jagi. Dasa lassin leat mii gearggusvuođajođiheamis mearridan rahpat vejolašvuođaid lágidit astoáiggedoaimmaid rávisolbmuide nugo hárjehallanguovddážiid ja hárjehallanhállaid.
Čuovvovaš doaimmaid lea vejolaš álggahit ođđajagimánu 20.b. rájes
- Astoáiggedoaimmaid mánáide ja nuoraide vuollel 20 jagi
- Nuoraidklubbaid
- Astoáiggedoaimmaid rávisolbmuide
Ráhppojuvvojit maid vejolašvuođat lágidit vuojadandiimmuid skuvlamánáide. Mii álgit deavdit vuojadanáldása dál ja guovtti vahku geahčen lea vejolaš geavahit dan.
Gearggusvuođajođiheamis isket maid vejolašvuođaid rahpat vuojadanáldása maiddai gussiide 1-2 vahku geahčen.
Mii deattuhit ahte riikaviidosaš rávvagiid mielde ii galggaše čađahit astoáiggedoaimmaid rávisolbmuide, muhto gearggusvuođajođiheamis aŋkke háliidit rahpat daid vejolašvuođaid. Ággan dása lea ahte ii leat nu garra njoammundeaddu min guovlluin, nu ahte adnojuvvo dohkálažžan dán muddui goit dahkat dan. Min vásihus lea maiddai ahte suohkana orrut leat čeahpit čuovvut njoammudávddaid eastadeami doaimmaid, ja maid ahte eai leat nu olu vejolašvuođat lágidit olgodoaimmaid go ii leat buorre čuoigan- iige skohtersiivu. Dan dihte háliidit mii ahte lágiduvvojit muhtin doaimmat suohkana orruide goit.
Mii deattuhit maid ahte fálaldagat rávisolbmuide sáhttet jođánit šluhttejuvvot jus njoammundilálašvuohta Tromssas, Davvi- Romssas ja muđui min guovlluin rievdá.
Buot astoáiggedoaimmaide gustojit dát njoammudávddaid eastadeami rávvagat:
- Ii searvat doaimmaide jus leat buohcci
- Buorre giehtabuhtisvuohta
- Doallat gaskka gos lea vejolaš dan dahkat
Ustitlaš dearvvuođaiguin
Anita Monsen Pedersen
Gáivuona suohkana váldodoavttir
