Odne lea olles Norga morrašis! Min buohkaid Gonagas Harald V lea eretvádjolan!

Mis lea Gáivuonas leamaš hui lihkku go min ráhkis gonagasbárra lea dáppe finadan máŋgii, sihke almmolaš guossástallamiin ja maiddai priváhta oktavuođain. Vuorasolbmuid buolva muitá sihkkarit hui bures gonagasbárra sivdnidanmátkki Norggas go gonagasbárra galledii min suohkana jagi 1992, dalle go Terje Solberg lei sátnejođiheaddji.

Mun muittán hui bures go deiven Gonagas Haralda ja Dronnet Sonja Nuorášváris 18.9.2013 go galledeigga Jiehtanas stašuvnna (700 mmb) Barents Rescue nammasaš stuora hárjehallama oktavuođas. Justiisaministtar Grete Faremo, suodjalusministtar Grete Strøm-Erichsen, politiijameašttir, fylkamanni ja ovddeš sátnejođiheaddji Bjørn Inge Mo serve maid hárjehallamii.

Doaibmi jođiheaddjin Nordnorsk Fjellovervåking (NNFO) nammasaš searvvis bessen leat verdde stašuvnnas, ja mu fárus lei maid geologa ja dál sekšuvdnajođiheaddji NVS:s Lars Harald Blikra, ja eará bargit searvvis.

Mu mielas lei hávski beassat leat gonagasa ja dronnega fárus lunššas stašuvnnas gos boraimet biđđosa. Goappašagat čájeheigga stuora beroštumi barggus stáđismeahttun vári goziheamis. Mun bessen maiddai muitalit gonagasbárrii teknihkalaš goziheami birra mii huksejuvvui jagi 2007.

Vázzintuvrra lunšša maŋŋá bođii čielgasit ovdan ahte gonagas bures diđii geologalaš dilálašvuođaid birra váriin, ja vuhttui hui bures Gonagasa ja Dronnega jearaldagain geologii Blikrai ahte berošteigga hui sakka fágas. Dasa lassin lei maid hui čielggas ahte min gonagasbáras lei empatiija buot olbmuin geat orrot Ivguvuona birra ja geat juohke beaivvi fertejit eallit váraiguin.

Munnje lei hui fámolaš oaidnit go 3 Bell helikoptera seivo váris ja Vuošvákki guvlui, ja fárus lei min alimuskomándejeaddji.

Mun in goassege boađe vajálduhttit dán erenomáš galledeami jagi 2013 čakčabeaivvi.

Odne leat mii oallugat geat buriin muittuiguin čájehit giitevašvuođa min ráhkis gonagassii su guhkes ja oskkaidvuođa bálvalusa ovddas olles Norgga álbmogii!

Sádden liegga jurdagiid ja ovddasmorraša gonagasbearrašii

Visot Norgga ovddas

Gonagas lea jápmán, ellos Gonagas!

Sátnejođiheaddji Bernt Eirik Isaksen Lyngstad