Kulturskuvla

Kulturskuvlla bargu lea huksejuvvon ollislaš olbmo odnui ja jurdda dasa ahte buot olbmuin lea estehtalaš áicu ja ovdanbuktindárbbut man sáhttá ovddidit oahpahusa bokte. Kulturskuvla galgá addit oahpahusa mas lea alla kvalitehta buot kreatiiva fágain ja mas deattuhit fátmmasteami ja heiveheami ovttaskas olbmo dásis. Kulturskuvla galgá ovddidit ovttasbarggu ásahusaiguin, servviiguin, organisašuvnnaiguin sihke báikkálaččat ja regionálalaččat. 

Kulturskuvla lea seammá visttis go Gáivuona girjerádju, ja KRED Nord/Kåfjord Meta ja bargá aktiivvalaččat huksemin innovatiivva ja kreatiivvalaš fálaldagaid buot orruide.

Gáivuona kulturskuvla lea maiddai bures čalmmustahttán sámi ja kvena kultuvrra. Min mielas lea dehálaš ahte kulturskuvla oahpásmahttá ohppiid Gáivuona máŋggagielatvuhtii, báikkálaš kultuvrraide ja árbevieruide. Dál fállát Kielitruisku - Kvena giellariššu suohkana mánáidgárddiide ja smávvaskuvllaide vuođđoskuvllas. Jagi 2024 rájes sáhttit maiddai fállat duodjefága kulturskuvllas.

Gáivuona kulturskuvllas lea guhkes ja vuovdnás historjá. Kulturskuvla ásahuvvui jagi 1979, - dalle Gáivuona musihkkaskuvlan. Jagi 1994 viiddiduvvui doaimmahus dáiddabajiin ja ovtta gaskka 1997 rájes fas govvenbájiin. Kulturskuvla lea guovddáš kulturásahus ja resursaguovddáš suohkanis ja ovttastahttá buolvvaid, giliid ja iešguđetlágan kultuvrralaš árbevieruid. Dál lea oahpahus Dálusvákki Kulturguovddážis ja Olmmáivákki kulturskuvlalanjas - Davvi álbmogiid guovddážis.

Odne fállojuvvo oahpahus iešguđetlágan čuojanasaiguin ja mii addit maiddai oahpahusa visuála fágain dáiddabájiid bokte sihke mánáide, nuoraide ja rávesolbmuide. Mii fállát maiddai bargobaji digitála reaidduid geavaheami bokte ovttas KRED Nordain. Dasa lassin fállat áigodatkurssaid drámás ja teáhteris, ja Kulturstoahkama bokte mii lea fágaidgaskasaš fálaldat smávvaceahki ohppiide fállojuvvo maiddai introdukšuvnna dáiddafágaide. Kulturskuvla galleda maiddai suohkana mánáidgárddiid "Kielitruisku-Kvena giellariššu" nammasaš musihkkamánaidgárddiin, ja prošeavttain “Dáidda mánáidgárddis”. Prošeavtta ulbmil lea galledit mánáidgárddiid ja oahpahit sin dáidaga birra proseassaid bokte. Kulturskuvllas lea maiddai dirigeanta Gáivuonkoaras – Okta dehálaš kulturaktevra suohkanis. 

Kulturskuvla galgá fátmmastit buohkaid, ja mis leat oahppit buot ahkecehkiin! Min mielas lea dehálaš hukset arenaid olbmuide geat dárbbašit erenoamážit heivehuvvon oahpahusa, ja atnit kulturskuvla dehálaš institušuvdnan olggušteami vuosttildeamis. 

Gáivuona kulturskuvla lea maiddái rámis prošeavttain "Kielitruisku - Kvena giellariššu". Guovddáš aktevrrat nugo UDIR, Kulturdirektoráhtas ja Romssa ja Finnmárkku fylkkasuohkan leat jagi 2019 rájes lea doarjjan prošeavtta ulbmilin ovddidit erenoamáš fálaldaga kvenagielas ja kultuvrras. Prošeakta lea oaivvilduvvon unnimusaide. Dáruiduhttinpolitihkka lea maiddai kvena kultuvrii čuohcan garrasit, ja prošeakta lea dehálaš oassin oažžut kultuvrra fas oidnosii. 

Duodji galgá maiddai šaddat fágan kulturskuvllas jagi 2024 mielde, dalle sáhttit fállat kurssaid ja bargobájiid nu go oahpásmuvvama báikkálaš mearrasámi duodjái. Dát lea dehálaš bargu go galgat áimmahuššat min guovllu rikkis kulturárbbi ja árbevieruid. Kulturskuvla lea giitevaš go lea ožžon doarjaga Norgga Kulturskuvlaráđis "Håndverksløftet" bokte, Sámedikkis ja Romssa fylkkasuohkanis mat dahket dán dehálaš barggu vejolažžan.