Prošeavtta mihttomearri
KåfjordMeta Online lea digitála gávnnadanbáiki datakultuvrra, e-valáštallama ja eará astoáiggeberoštumiid váste.

Geográfalaš dilálašvuođat dahket ahte nuoraide ja nuoraidjoavkkuide lea váttis gávnnadit dáppe suohkanis. Digitála gávnnadanbáikkis eai leat diet hehttehusat, go fálaldat lea neahta bokte ja danne olámuttos vaikko gos Gáivuonas orožat. Prošeavtta váldo mihttomearri lea ásahit sosiála lávddi mii eastada aktovuođa ja olggobeallái gártama, dat hukse oktavuođaid giliid gaskka ja čohkke nuoraid geain leat oktasaš beroštumit.

Vai nagodit duohtandahkat dán, háliidit mii ahte nuorat ieža servet hábmemii nu ahte fálaldagat áigges áigái leat olámuttos ja relevánttat sidjiide. Mii váldit mielas vuostá oaiviliid ja árvalusaid dasa movt mii sáhttit ain ovdánit.

Gávnnadanbáikki birra
Juste seamma ládje go dábálaš nuoraidklubba leat maiddái online-variánttas iešguđet lanjat gos nuorat sáhttet deaivvadit ságastallat, gamet, musihkka guldalit, filmmaid geahččat ja eará kreatiiva doaimmaide searvat. Čoahkkananbáikki olis lágiduvvojit maid áigges áigái ráidogilvvohallamat, gilvvut, workshops ja kurssat. Dáppe leat álki gávnnadit ustibiiguin, ovttas searvat doaimmaide ja hukset ođđa relašuvnnaid.

Muhtin áŋgiris nuorra moderáhtorat leat mielde hálddašeame gávnnadanbáikki, sii veahkehit miellahtuid, hástet ođđa nuoraid fárrui ja fuolahit ahte buohkain leat buorit vásáhusat doppe.

 Persovdnasuodjalus
Mii háliidit ahte gávnnadanbáiki galggašii hásttuhit sosiála searvamii ja ovdáneapmái, ja seammás lea dorvvolaš ja searvadahtti arena min nuoraide. Danne lea server gitta, muhto rahppojuvvo daid nuoraide geat ohcet registrerema.

Dieđuid dan birra geat leat miellahtut ožžot dušše prošeavtta bargit ja guoskevaš miellahtuid fuolaheaddjit, ja dat eai adno masage earái go hálddašit KåfjordMeta Online miellahtuid. Jus muhtin ii šat háliit leat miellahttu, de sáhttá sihtat sihkkut iežas persovdnadieđuid miellahttolisttus.