Njuolggadusat oastit ja vuovdit dollarusoniid
Dollarusoniid sáhttá vuovdit geavaheddjiide dušše rámbuvrras áiggis juovlamánu 27.-31. beivviid. Rievttimielde ii leat lohpi oastit profeššunealla dollarusoniid ja rakeahtaid. Suohkana buollindoaimmahat sáhttá addit lobi oastit dakkár dollarusoniid, muhto lohpi lea ráddjejuvvon dušše ovtta viežžamii. Loga eanet dollarusoniid vuovdima, oastima ja geavaheami birra láhkanjuolggadusas dan birra ahte movt galgá gieđahallat ávdnasiid mat sáhttet bávkkehit, suoidnemánu 26. b. 2002 rájes nr. 922. Dá leat moadde váldočuoggá:
Dollarusonat juhkkojuvvojit čuovvovaš klássaide riskadási mielde:
- Klássa I a: Ruktobihtát/”kruttlapper”, “knall Bon-Bon” etc.
- Klássa I b: Beavdebombbat, Party-Poppers, “stjerneskudd” jna.
- Klássa II: Eanandollarusonat, unna romalaš gintalaččat, “beaivvážat” ja eará dollarusonat mat eai leat nu várálaččat.
- Klássa III: Rakeahtat, áibmobombat, dollalihtit, stuora romalaš ginttalat ja bombabáhtterat jna.
- Klássa IV: Profeššunealla Display-dollarusonat.
Son guhte áigu doallat gávppi eksplosiiva gálvvuiguin ferte ožžon lobi. Gávppašanlohpi sáhttá addojuvvot dušše olbmuide geat leat dohkálaččat, ja dat guoská dušše dihto gávpebáikki gávppašeapmái. Ii leat dárbu ohcat lobi vuovdit klássa I dollarusoniid.
Ohcamuš oažžut lobi vuovdit klássa II ja III dollarusoniid ferte ollen suohkanii ovdal miessemánu 1. beaivvi.
Geavaheddjiin ii leat lohpi oastit klássa IV dollarusoniid, klássa II ja III rakeahtaid, ii ge pyroteknihkalaš gálvvuid mat sáhttet boastut ipmirduvvot stoahkanhearvan. Servodatvuođasihkarvuođa ja gearggusvuođadirektoráhta neahttasiidduin lea bagadallan dollarusoniid dohkkeheami, viežžama, vurkkodeami, oažžuma, gávppašeami ja geavaheami birra.
