Dá lea bajilgovva das maid sáhtát hukset ja maid lea dehálaš vuhtiiváldit:

Seaidni

Jus seaidni lea unnimusat 1,0 mehtera ránnjá rájis eret, de it dárbbaš ohcat lobi cegget dan jus dat

  • lea eanemusat 10,0 m guhku
  • ii gokkoge leat badjel 1,8 m alu

Jus seaidni lea lagabus ránnjá ráji go 1,0 mehtera dahje jur ráji nalde, de it dárbbaš ohcat lobi cegget, jus seaidni

  • lea eanemusat 5,0 mehtera guhku
  • ii gokkoge leat badjel 1,8 m alu

Seaidni sáhttá sierra ceaggát dahje leat gitta visttis. Jus galggat cegget eanet seinniid maid lavttát aktii, de fertet lobi ohcat.

Anteannat

It dárbbaš ohcat lobi cegget

  • anteannavuogádaga mii lea gitta 5,0 m alu
  • parabolaanteanna mas diamehter lea gitta 1,2 m
  • panelaanteanna bidjon seaidnái man allodat lea gitta 2,0 m

Jus bijat aktii moanat anteannaid moanat sierra giddenrusttegiidda, de dan gohčodit máŋggat anteannavuogádahkan ja fertet ohcat lobi cegget. 

Dehálaš: It ábut cegget anteanna nu ahte lea várran persovdnadorvvolašvuhtii, geahča gáibádusaid guoskevaččat dearvvašvuhtii, birrasii ja dorvvolašvuhtii plána- ja huksenlágas.

Unnibuš doarjjamuvra

Doarjjamuvra mii lea unnimusat 1,0 mehtera ránnjárájis sáhttá leat gitta 1,0 m alu ilmmá ahte dárbbašat ohcat ceggenlobi. Jus lea unnimusat 4,0 mehtera ránnjárájis eret, de sáhttá leat gitta 1,5 mehtera alu. Muvra ii ábut hehttet oaidnimis luotta.

Unnibuš deavdimat dahje eatnama jalgen


Unnibuš deavdimiiguin ja eatnama jalgemiin oaččut duššo fal álgit, nu guhká go čuovut huksenteknihkalaš láhkaásahusaid dorvvolašvuođagáibádusaid. Eaktu lea ahte allodaterohus álgoeatnama ektui lea eanemusat

  • 3 m guovlluin gos eai leat ollu viesut
  • 1,5 m guovlluin gos leat ollu viesut
  • 0,5 m ráido- ja laktaviessoopmodagain ja sullasaččain gos viesut leat ollu

Deavdin dahje jalgen ferte álgit unnimusat 1 mehtera ránnjárájis eret.

Mii adno “unnibužžan” lea čadnon earet earát dasa movt čuohcá lagasbirrasii.

Luottat ja biilačuoččuhanbáikkit

Siskkáldas luottaid ja biilačuoččuhanbáikkiid dáfus mat leat unnimusat 1,0 mehtera eret ránnjá rájis ii gáibiduvvo ohcamuš.

Siskkáldas luottain oaivvilduvvo luodda mainna beassá opmodahkii dahje luodda iešguđetlágán visttiid gaskkas opmodagas.

Áiddit dohkkehuvvon boazodoallolága bakte

Bistevaš áiddit ja rusttegat mat leat meannuduvvon ja dohkkehuvvon boazodoallolága ektui sáhtát cegget ilmmá ohcama haga.

Gaskaboddosaš áiddit ja rusttegat, mat eai galgga ceaggát guhkitgo 2 mánu, eaige gáibit ohcamuša.

Divodeamit

It dárbbaš ohcat lobi divodit huksenteknihkalaš rusttegiid, nugo ovdamearkka dihte

  • Áibmomolsunrusttet
  • čáhce- ja ruferusttegat
  • buollindieđihanvuogádat
  • heaisa

Divodemiin oaivvilduvvo bargu mii lea dárbbašlaš vai rusttet galgá doaibmat nugo ovdal.