Troms Kraft Produksjon nammasaš fitnodat ásaha ođđa foandda, ja juohká jahkásaččat 1 miljovnna ruvnno isitsuohkaniidda mat buvttadit elfámu. Dán jagi juolluduvvojit ruđat buriid doaimmaide Gáivuona suohkanis.
Troms Kraft Produktsjon lea fitnodat mii buvttada elfámu Troms Kraft konseartnas. Fitnodat doaimmaha oktiibuot 10 čáhcefápmorusttega ja ovtta bieggafápmorusttega čieža suohkaniin Romssa fylkkas.
Jagi 2022 ledje isitsuohkanat čohkken sullii 40 miljovnna ruvnnu sisaboahtun vearuin ja divvagiin mat gusket fápmobuvttadussii, dasa lassin boahtá sisaboahtu konsešuvdnafámus. Dál áigu fápmofitnodat addit ruovttoluotta suohkaniidda mat buvttadit elfámu maid servodat dárbbaša.
- Go lea isitsuohkan mii buvttada elfámu, de addá máŋga ovdamuniid. Muhto dása čuvvot moadde hehttehusa maiddai mat soitet čuohcat ássiide. Ođđa elfápmofoanda galgá váikkuhit ahte olbmot háliidit orrut suohkaniin ja eai hálit fárret. Báikkálaš gearggusvuohta galgá maid buoriduvvot suohkaniin mat sávvet buresboahtima fápmobuvttadussii, dadjá hálddahusdirektevra Helge M. Eklund Troms Kraft Produksjon nammasaš fitnodagas.
Juolluda 1 miljovnna ruvnno Gáivutnii
Dán jagi galgá olles miljovdna mannat Gáivuona suohkanii, ja seammás lea suohkan ožžon bargun juohkit ruđaid buriid doaimmaide maid suohkana eaktodáhtolaš joavkkut ja searvvit lágidit.
- Gáivuotna lea dehálaš fápmobuvttadansuohkan Romssa Fylkkas. Diibmá lei erenoamáš stuora dulvi mii billistii olu eatnamiid ja opmodagaid. Dál galgá visot ruhta jagi 2023 ovddas mannat Gáivuotnii doarjjan sidjiide geaidda dulvi čuozai, dadjá Eklund.
Hástá joavkkuid ja servviid ohcat doarjaga
Sátnejođiheaddji Bernt Eirik Isaksen Lyngstad lea ilus juolludeami ovddas ja hástá joavkkuid ja servviid Gáivuonas ohcat doarjaga.
-Mii leat ilus juolludeami ovddas elfápmosuohkaniidda ja leat dieđusge maiddai duhtavaččat go visot ruhta manná midjiide Gáivuonas. Min suohkanis leat ollu iešguđetlágan prošeavttat ja doaimmat mat galget váikkuhit álbmotdearvvašvuhtii, orrunmillii ja báikkálaš gearggusvuhtii. Mii bivdit joavkkuid ja servviid olles suohkanis ohcat doarjaga dán ortnega čađa, dadjá Lyngstad.
Dieđut neahttasiiddus
Ruđat elfápmofoanddas mat juolluduvvot Troms Kraft nammasaš fitnodagas galget mannat servviide, joavkkuide ja organisašuvnnaide suohkaniin gos Troms Kraft doaimmaha elfámu.
Prošeavttat mat ožžot doarjaga galget váikkuhit buori orrunmillii, ja nannet gearggusvuođa suohkaniin. Boahtte jagi rájes besset ássit Gáivuonas, Omasvuonas, Ivgus, Málatvuomis, Saččas, Romssas ja Gálssas ohcat doarjaga juohke jagi.
Dieđut elfápmofoandda birra almmuhuvvot Troms Kraft nammasaš fitnodaga neahttasiidduide čavčča mielde, ja vuosttáš ohcanáigemearri šaddá miessemánu jagi 2024. Mii sávvat ahte oallugat geavahit vejolašvuođa ohcat doarjaga, dadjá Eklund.
Oktavuođaolbmot:
Helge M.Eklund, Troms Kraft Produksjon hálddahusdirektevra, tlf. 481 97 522
Bernt Eirik Isaksen Lyngstad, Gáivuona suohkana sátnejođiheaddji, tlf. 481 59 595
