Gáivuona Nuoraidráđđi /Kåfjord ungdomsråd /Kaivuonon Nuortenraati

2019 čavčča bođii ođđa suohkanláhka fápmui. Suohkanláhka § 5-2 cealká čuovvovaččat: Eará suohkanlaš orgánat galget ásahuvvon dán lága mearrádusa mielde. Čuokkis e) cealká: Vuorrasiidráđđi, ráđđi olbmuide doaimmashedjonemiiguin ja nuoraidráđđi dahje eará oassálastinorgána nuoraide. Muđui gusket seamma mearrádusat go álbmotválljejuvvon orgánaide § 5-1 mielde.

Muđui cealká § 5-12 ahte: Suohkanstivra ja fylkadiggi galget ieža válljet vuorrasiidráđi, ráđi olbmuide doaimmashedjonemiiguin ja nuoraidráđi dahje eará oassálastinráđi nuoraide. Nuoraidráđis válljenáigodat galgá leat gitta guokte jagi. Nuoraidráđđi dahje nuoraid oassálastinráđi miellahtut eai galgga leat deavdán 19 jagi dalle go válljejuvvojit. Nuoraidráđđi lea lága mielde ráđđeaddi orgána suohkanii, ja das lea riekti buktit cealkámušaid áššiin mat gusket nuoraide.

Muđui čuožžu njuolggadusas nuoraidráđiid oassálastinortnegiid birra “Forskrift om medvirkningsordninger om ungdomsråd” ahte:

• suohkanstivra galgá ásahit rutiinnaid mat sihkkarastet ahte ráđđi vuostáiváldá áššiid nu árrat áššemeannudeamis ahte ráđi cealkámušain lea vejolašvuohta váikkuhit áššiid bohtosiidda
• ráđđi sáhttá ieš evttohit áššiid
• cealkámušat galget čuovvut dan suohkanlaš orgána áššedokumeanttaid mii dahká loahppamearrádusa áššis
• suohkanstivra sáhttá addit ráđđái válddi juogadit juolludemiid
• ráđđi galgá juohke jagi čállit sierra jahkedieđáhusa mii galgá ovdanbuktojuvvot suohkanstivrii
• suohkanstivra sáhttá addit ráđi miellahtuide čoahkkin- ja hupmanvuoigatvuođa álbmotválljejuvvon orgánain
• suohkanstivra mearrida nuoraidráđi oktiibidjama ja mearrida maid galle miellahtu ja várrelahtu ráđis galget leat
• organisašuvnnain mat ovddastit nuoraid lea riekti evttohit miellahtuid ráđđái mat ovddastit sin beroštumiid
• ráđđi galgá válljet jođiheaddji ja nubbinjođiheaddji miellahtuid gaskkas
• ráđđi galgá oažžut doarvái čállinveahki
• ráđis lea riekti buktit cealkámušaid ovdal go suohkanstivra oktiibidjá čállingotti, mearrida áššemeannudannjuolggadusaid ja bušeahta sidjiide.

Gáivuona suohkanis lea máŋga jagi leamašan nuoraidráđđi mas leat ovddasteaddjit main lea čoahkkin- ja hupmanvuoigatvuohta njealje iešguđetlágan lávdegottis, mii juolluda gárrendilleeastadeaddji ruđaid, vállje sierra jođiheaddji ja nubbinjođiheaddji, mas lea fásta čálli, ieš ovddida áššiid ja mas leat gitta 19-jahkásaš miellahtut. Dainna lágiin devddii Gáivuona nuoraidráđđi jo, ovdal go ođđa suohkanláhka fápmuibiddjojuvvui, olu gáibádusaid lágas. Juovlamánu 2019:s ođastuvvojedje liikká Gáivuona nuoraidráđi njuolggadusat go ođđa suohkanláhka ja njuolggadusat oassálastinorgánaid birra earret eará gáibidit ahte lea suohkanstivra mii galgá válljet nuoraidráđi ja mearridit dan oktiibidjama.

Loga njuolggadusaid dás