Ođđasat miessemánu 25.b 2020

Buorre kapasiteahtta

Torbjørn Røe Isaksen dadjá ahte lei áibbas riekta álggahit doaimmaid njukčamánus go fertejedje sihkkarastit ahte fásta- ja doavttirvávttaide lei vejolaš geavahit visot iežaset áiggi ja bargonávccaid dálkkodit buhcciid dan sajis go čállit buohccindieđáhusaid. Dál go njoammudilálašvuohta lea rievdan ja dasa lassin bohtet raporttat dearvvasvuođabálvalusain, de sáhttá jávkkadit viiddiduvvon iešdieđáhusrivttiid.

Bargoaddi sáhttá ain vuosttáš 16 beivviid válljet addit lobi geavahit iešdieđáhusa muhto geassemánu 1.b. rájes, de ii leat šat geatnegahtton dohkkehit dan. Jus viiddiduvvon iešdieđáhusrievttit eai leat šihtton bargoaddi ja bargi gaskka, de lea lea vejolaš geassemánu 1.b. rájes gáibidit doavtterduođaštusa njealját beaivvis. Seammá dáhtonis ferte bargi maid bargan bargoaddi ovddas unnimusat guokte mánu ovdal go sáhttá geavahit iešdieđáhusa.

Iešheanalaš ealáhusdoallit ja luođubargit

Rievdadusat gusket maiddai iešheanalaš ealáhusdoalliide ja luođubargiide ja geassemánu 1.b. rájes fertejit maiddai sis leat buohccindieđáhus doaktáris vai lea buohcanruđaid riekti njealját beaivvis álbmotoajus. Iešheanalaš ealáhusdoalliid ja luođubargiid buohcanruđaid riekti njealját beaivvis guoská dušše buozalmasjávkamii COVID-19 geažil.