Dán vahkkoloahpa duođaštuvvui okta njoammundilálašvuohta man sáhttá čatnat Dálusvákki skuvlii. Skuvllas leat bargit ja oahppit, ja maiddai sin lagašoktavuođat váldán joavkoiskosiid.  

Dán rádjai leat guokte positiivva iskosa duođaštuvvon Dálusvákki skuvllas, ja lassin lei ovtta lagašoktavuođas positiivva iskkus.  

Vurdojuvvo ahte eanet olbmot váldet iskosa ihttin, dalle bohtet fas ođđa dieđut.

Ollu váhnemat ballet ja háliidit diehtit makkár doaibmabijut biddjojuvvojit johtui. Suohkan čujuha ovddit almmuhusaide gos boahtá ovdan ahte servodat dál lea rahppojuvvon pandemiija maŋŋil, ja ahte ii giddejuvvo nu jođánit jus ii leat áibbas dárbbašlaš.

Suohkanis biddjojuvvojit fas johtui doaibmabijut jus šaddá alla njoammundeaddu guhkes áiggis mii čuohcá dearvvašvuođabálvalussii ja buohcciviesokapasitehttii. Suohkanis ii leat muđui láhkavuođđu gáržžidit orruid árgabeaieallima.  

Johtolatčuovgamodealla govvida mot galgá gieđahallat iešguđetlágan dásiid njoammudávddaid eastadeamis sihke skuvllain ja mánáidgárddiin. Ovdal bođii ovdan modeallas ahte ruovttuskuvla galggai árvvoštallojuvvot. Dát čuoggá lea dál váldojuvvon eret. Skuvlla juohká dan sajis ohppiide kohorttaide ja bassá hui dárkilit.

Dutkamušat čájehit ahte vai suddjet mánáid ja nuoraid, de eai galggaše leat gáržžiduvvon skuvlafálaldagat guhkit áiggi perspektiivvas go dát čuohcá negatiivvalaččat sidjiide.  

Dálvvi čađa vurdojuvvo ahte ihtet vel eanet njoammundilálašvuođat, ja nu maiddai Gáivuonas. Jus galgá bidjat johtui doaibmabijuid mat čuhcet skuvlafálaldahkii juohke háve go duođaštuvvo njoammun,  de dieđusge boahtá čuohcat garrasit mánáide.

Dan dihte leat oppalaš rávvagat servodagas ja lea dehálaš ahte ássit doahttalit daid.    

Deháleamos ráva lea ahte jus leat buohcci, de galggat leat ruovttus. Jus rávisolbmot ja mánát leat buohccit, de eai galgga mannat bargui eaige skuvlii. Mielddusin lea skovvi masa galggašii oahpásmuvvat.

Buot earát, maiddai lagasoktavuođat sáhttet mannat skuvlii ja bargui nu go dábálaččat. Astoáiggefálaldagat ja doaimmat sáhttet maiddai mannat nu go dábálaččat.

Ustitlaš dearvvuođaiguin

Anita Monsen Pedersen                                       
 

Gáivuona suohkana váldodoavttir