Dán mánu beasaimet ávvudit ođđa Kulturguovddáža rahpama. Lei fiinna beaivi mas ledje sihke sáhkavuorut, oahpisteapmi ja gáhkut. Mii geat bargat dáppe leat giitevaččat go buohkat leat dorjon min prošeavtta sihke hálddahusas ja min politihkkarat geat adde vejolašvuođa geahččalit hábmet juoidá mii lea ođas ja innovatiiva kultursuorggis.
Mii maiddai giitit UKM, Sparebank1 Samfunnsløftet, Troms Holding, Romssa fylkkasuohkana, Romssa Fylkkagirjeráju, Kulturtanken, BUFDIR, Ungdom og fritid, ja Kultur ja dásseárvodepartemeantta mat leat min doarjjaolbmot. Várresátnejođiheaddji Svein Leiros (GB) sártnui kultuvrra birra servodatguoddin ja čuohpai bátti.
Hurra!
Mii sáhttit maid iluin muitalit ahte Romssa fylkkasuohkan lea juolludan 500.000 r. KRED Nordii vai beassat hábmet buriid deaivvadanbáikkit ja doaimmaid čadnon dihtorspeallamii. Lea hui buorre oaidnit ahte min bargu lea dohkkehuvvon, ja dát fas boahtá nannet dihtorspeallankultuvrra Romssas.
Kultuvrra ja dearvvašvuođa váldolávdegoddi lea dasa lassin mearridan juolludit 2.000.000 r. Kulturguovddážii “Desentralisert ordning for tilskudd til kulturbygg” bokte. Dát leat maid buorit ođđasat ja bohtet leat bures atnui! Nuoraidklubba Skjervøy ungdomsklubb leat maid galledan min čakčaluomus. Nuorat čájehedje beroštumi ja besse speallut ovttas, ja lassin veahkeheimmet hábmet ohcamuša Ungdom og Fritid nammasaš riikkasearvái speallanrusttegiid oastimii Skiervá ođđa astoáigeklubbii.
Loabága suohkana ovddasteaddjit leat maiddai galledan min ja ožžon oahpisteami Kulturguovddážis. Sis leat seammá hástalusat go mis ledje ovdal oktasaš čoahkkinbáikki ásaheami. Mii sávvat ahte vásáhusat min luhtte bohtet leat ávkin sidjiide boahtteáiggis.
Davvi-Norgga čáffamus breahttaspeallanbeavdi lea sajis!
Rathskellers Greikkas lea ráhkadan beavddi mas lei jagi vuordináigi! Dál lea válmmas buohkaide geat ráhkistit breahttaspealuide! Hui hávski!
Frank Haugseth • 92050432
