-Anita Monsen Pedersena mielas lea dearvvašvuođaiskkadeapmi hui buorre fálaldat sidjiide geat bovdejuvvot dasa, ja lea maiddai buorre sidjiide geain bargu lea plánet dearvvašvuođafálaldagaid Gáivuona suohkanis. Maŋŋel čađahuvvon iskkademiid ožžot anonyma čoahkkáigeasu mat dahket barggu álkibut plánet boahtteáiggi dearvvašvuođafálaldagaid suohkanis. Áidna masa Monsen Pedersen ii liiko SAMINOR3- iskkademiin lea ahte ieš lea beare nuorra searvat dása.
Mun gal lean doarvái boaris searvat dadjá Gáivuona sátnejođiheaddji Bernt Lyngstad gii hástá buohkaid gaskkal 40 – 79 jagi dahkat dan seammá.
Mu mielas lea dušše positiiva oažžut EU-kontrolla iežan dearvvašvuođas, ja mađi eanet olbmot geat servet, dađi buoret visogova oažžut mii suohkanis go lea sáhka boahtteáiggi dearvvašvuođafálaldagaid birra, dadjá Lyngstad.
Nu oallugiid go vejolaččat
Iskkadeapmi lea UiT Norgga árktalaš universitehta bokte, ja jearranskovi ja dearvvašvuođaiskkadeami veahkkin besset buot oasálastit iskat varradeattu, ja leat go risikojoavkkus oažžut sohkardávdda.
-Mii diehtit ollu gávpotolbmuid dearvvašvuođa birra, muhto eat nu ollu giliolbmuid dearvvašvuođa birra dadjá váldodoavttir ja SAMINORa jođiheaddji Ann Ragnhild Broderstad. Broderstad lea sihke dutki Norgga árktalaš universitehtas ja doavtterspesialista sismedisiinnas UNN Hársttákas.
-Go orrut leat boarásmuvvame, de lea dehálaš ahte suohkan oažžu nu olu dieđuid go vejolaččat sin birra vai buoremus lágiid mielde plánet dearvvašvuođafálaldagaid boahtteáiggis, dadjá Broderstad.
Jávohisgeatnegasvuohta
SAMINOR lea 20 jagi leamašan dehálaš oassi dearvvašvuođa ja eallindili iskkadeamis Gaska ja Davvi Norggas. Gáivuona suohkan lea okta 49 suohkaniin mii lea válljejuvvon čađahit iskkadeami goalmmát geardde SAMINORa bokte.
-Juohke oassálasti lea liikka dehálaš beroškeahttá dearvvašvuođadilálašvuođas, sohkabealis, dahje kultuvrralaš duogážis dadjá Broderstad. Nu go du fástadoaktáris, de lea maiddai buot SAMINOR bargiin jávohisvuođageatnegasvuohta, ja bohtosat vurkojuvvojit seammá bures jus livččet leamašan fástadoaktára luhtte.
Don mearridat
Buohkat leat bovdejuvvon iskkadeapmái, ja leat maiddai várrejuvvon áiggit, báiki, ja dáhtonat.
Ann Ragnhild Broderstad dadjá maid ahte lea vejolaš sirdit diimmu, dahje skuvihit iskkadeapmái dalle go heivešii.
Norggas galgá dál leat álbmotiskkadeapmi mas ulbmil lea kártet mot dáruiduhttinpolitihkka ja nubbi máilmmisoahti leat čuohcan min dála dearvvašvuhtii. Dakkár iskkadeapmi ii leat ovdal čađahuvvon Norggas ovdal.
- Iskkadeamit mat leat čađahuvvon ovdal čájehit ahte soahti ja dáruiduhttin leat čuohcan midjiide davvin, ja SAMINOR3 iskkademiin jearrat oassálastiin gusto go dát odne maid davvi álbmogii, loahpaha Broderstad.
Eanet dieđut:
SAMINOR3, tlf 406 49 469 e-poasta: saminor@uit.no
Fina maid www.saminor.no nammasaš neahttasiidduis
Ann Ragnhild Broderstad lea Davvi-Norgga Universitehtabuohcciviesu váldodoavttir ja dutki Norga árktalaš universitehtas. Son lea maiddai SAMINOR3 jođiheaddji mii boahtá Gáivutnii skábmamánus. (Govven: Ante Siri).
