Sámi giellaguovddáš lea Gáivuona suohkanii gullevaš ossodat, ja dat vuođđuduvvui jagi 1994. Gáivuona Sámi giellaguovddáš galgá leat oahpahan- ja máhttoguovddáš Gáivuona suohkana ja mearrasámi guovlluid várás erenoamážit. Sámi giellaguovddáža váldoulbmil lea nannet sámegiela geavaheami ja beroštumi das, ja leat giella- ja kulturbargguid resursa- ja máhttoguovddáš sihke báikegottis ja viidátge guovllus. Mii bargat áigumušain seailluhit, ovddidit, dokumenteret ja gaskkustit sámegiela ja sámi kultuvrra, vuosttažettiin báikegottis.
Dan barggus mis leat máŋga sierra lahkonanvuogi omd. giela čalmmustahttin, diehtojuohkin ja oahpaheapmi, ja sámegielat birrasiid huksen. Mii čoaggit ja oahpisin dahkat báikkálaš sámi fáttáid ja ávdnasiid, ja dasto leat vel doarjjan olbmuide geain lea beroštupmi sámegielas ja sámi kultuvrras.
Váldodoaimmat
Nannet sámegiela geavaheami ja beroštumi mánáidgárddiin, skuvllain ja ássiid gaskkas muđui.
Fallat sámegiel oahpahusa mii leat heivehuvvon suohkana bargiide ja eará ráves olbmuide.
Lágidit semináraid ja oanehis gurssaid suohkana bargiide ja earáide dárbbuid mielde.
Jorgalit Gáivuona suohkana ovddas ja maiddái eará institušuvnnaid, ásahusaid ja serviid ovddas.