Gáivuona suohkanis lei borgemánu 30.b.2022 čoahkkin Troms Kraft Produkšuvnnain, Norgga čázadat ja energiijadirektoráhtain (NVE), Romssa- ja Finnmárkku stáhtahálddašeddjiin, ja Vissiin dulvvi ja billašumiid birra Gáivuoneanus.

Suohkan orienterii dulvvi billašumiid, ja doaibmabijuid birra mat ledje álggahuvvon dán rádjái, ja maiddai čuovvuleami álbmoga hárrái.  

NVE ja Troms kraft produkšuvdna orienterii dulvvi dieđihanvuogádaga birra ja mii geavai ovdal ja maŋŋel dan. Čáhcejođádat lea mihttojuvvon čázadagas jagi 1961 rájes, ja čájeha ahte ledje stuora giđđadulvvit regulerema rádjai jagi 1971. Dán jagi mihtideamit eai leat vel kalibrerejuvvon, muhto dán rádjai orro leamen ahte lei stuorámus dulvi maŋŋel regulerema. Dulvi lei liikka stuoris dahje stuorábut go stuorámus dulvvit 1960 logus.  

Reguleren čázadagas unnida giđđadulvvi nu guhká go lea kapasitehta Guolášjávrris ja jogažiin, muhto ii doaimma jus šaddá beare olu čáhci. Bistevaš liegga dálki ja muohta mii suttai gáissáin dagahii ahte juste dát geavai.   

Lei geassemánu loahpas dieđihuvvon fiskes ja maŋŋel runta dulvevárrehus alla davvi guovllu váriin. Várrehusat eai dađi bahábut atte čielga gova ovttaskas čázádagain. Gáivuneanu dulvi bođii fáhkkestaga ja lei stuoris eará čázadagaid ektui, ferte lagabui iskat manne lei nu. Dán jagi dulvi Gáivuoneanus dagahii stuorá ja viiddis erošuvnna mii doalvvui olu sádduid ja láirri eanu mielde, dát iešalddis lea stuora dulvviid dovdomearka čázádagain. Lea dehálaš árvvoštallat ollislaččat go galgá bidjat doaibmabijuid maŋŋel dulvvi. Boahtteáiggis bohtet maid šaddat stuora dulvvit, ja dan dihte ferte vuoruhit ollislaš doaibmabijuid mat vuhtiiváldet sihke sihkkarvuođa ja birrasa. Čoahkkin attii oktasaš dilálašvuođaipmárdusa ja vuođu buori ja koordinerejuvvon čuovvoleapmái.  

Troms Kraft produkšuvdna dieđihii ahte lei váttis ovdošit dán erenomáš dilálašvuođa. Statnett ii suovvan Troms Kraft produkšuvnna luoitit čázi turbiinnaid čađa áigodagas ovdal dulvvi ja go lei dulvi, dát dagahii ahte šadde dievvaseabbo magasiinnat go sávahahtti. Nu jođánit go Troms Kraft produkšuvdna fuobmái ahte Guolášjávrri čáhci dievai seammás go bohte ođasmáhttojuvvon dálkedieđáhusat, de mearridedje ja álggahedje unnidit čáhcehivvodaga. Troms Kraft produkšuvnnas barget visot maid sáhttet vai boađut eai diva bearehaga, ja deattuhit ahte áigot kártet dáhpáhusa viidásit. Gáivuona suohkana ja NVE fárus leat sihkkarat ahte leat ráhkkanan buorebut jus boahtteáiggis geavvá seamma ládje.   

Suohkan boahtá maŋŋel čoahkkima joatkit dokumenteret sihke mii geavai ovdal dulvvi, ja billašumiid dan maŋŋel. Troms Kraft produkšuvdna ja Vissi maid kártejit dáhpáhusa. NVE boahtá veahkehit hábmet doaibmabijuid go sis lea sihke gelbbolašvuohta ja bargovásáhus ovdalaš dáhpáhusain. Suohkan iešalddis vuoruha čuovvulit álbmoga.