Riddu Riđus ii lean aŋkke koronavirus

Vaikko guoktásis Riddu Riđu festiválas lei positiiva jođánisiskkus, de čájehedje PCR iskosa negatiivva bohtosiid. Álbmotdearvvašvuođainstituhta fágalaš rávvagiin bođii ovdan ahte ovdalgo sáhtii heaittihit sierravuođa ja visot errendoaibmabijuid, de fertejedje guokte PCR iskosa čájehit negatiivva bohtosa, nu mot čájehedje. Dalle ii lean šat dárbu sidjiide geat ledje definerejuvvon lagasoktavuohtan leat sierravuođas ja erremis. Vai sihkkarastit ahte dieđut dán birra ollii buot lagasoktavuođaide, de válddii suohkan oktavuođa singuin persovnnalaččat.

Gáivuona suohkan ii bidjan johtui eanet doaibmabijuid, muhto rávvii álggus ahte buoremus livččii šluhttet dahje maŋidit festivála ja eará lágidemiid doaisttážii. Lei vejolaš ollašuhttit festivála go suohkan manai eret rávvagiin, muhto seammás muittuhii ahte fertii čađahit lágidemiid njoammunsuodjalusnjuolggadusaid mielde. Positiivva jođánisiskosiid bohtosat rehkenastojuvvot duođalažžan dássážii go duođaštuvvo nuppe ládje. Ráđđehus rahpá servodaga ain eanet ja šaddá vejolaš lágidit stuora doaluid, seammás dadjet ahte njoammulogut bohtet lassánit. Dás vurdojuvvo ahte suohkanat ieža galget eastadit koronavirusnjoammuma.