Idjadangielddus olbmuide geat leat registrerejuvvon eará suohkana ássin – gielddus lea fámus 28.03.2020 rájes. Viessovovdna, spiikkártealtá, tealtáleairrat ja eará bissovaš ja sirddašahtti ássanovttadagat

Almmuhus

Gielddusmearrádus idjajit viessovovnnain, spiikkártealttáin, tealtáleirrain ja eará bissovaš ja sirddašahtti ássanovttadagain báikkiin gos olbmos ii leat álbmotregistrerejuvvon ássančujuhus.

Áššebajásčuvgehusat

Njoammunsuodjalusláhka:

Čujuhuvvo Láhkaásahussii errenáiggi, sirrema ja gildosa hárrái orodit astoáigeopmodagain jna. Covid-19 njoammuma dilis, láhkavuođuin lágas -1944-08-05-55§1-2 addojuvvon njukčamánus 2020. 

Njukčamánus 2020 addojuvvon láhkaásahusas § 5 čujuhuvvo, ahte olbmot gildojuvvojit idjadeames astoáigeopmodagain mat leat eará suohkanis go doppe gos sii leat álbmotregistrerejuvvon. Buohkat galget vuođđodilis bissut iežaset ruovttusuohkaniin eastadan dihte njoammudeami ja njoammunuhki. Beaivemohkiid besset dahkat juos eai sáhte ávdnasiid ja opmodaga bearráigeahččat eará láhkai.

Njoammunsuodjaluslága ulbmilparagráfas bájuhuvvvo čuovvovaččat:

 Dán lága ulbmil lea suodjalit álbmoga njoammu dávddaid vuostá nu ahte dat eastaduvvojit ja hehttejuvvojit njoammumis álbmogis, ja maid nu ahte dakkár dávddat hehttejuvvojit buktojuvvomis Norgii dahje dolvojuvvomis Norggas eará riikkaide. Láhka galgá váfistit ahte dearvvašvuohtaeiseválddit álggahit dárbbašlaš njoammunsuodjalusdoaibmabijuid ja buohtalastet iežaset doaimma njoammunsuodjalusbarggus.
 

Njoammunsuodjaluslága §§ 7-2 ja 4-1 mielde sáhttá suohkandoavttir dahkat sierra mearrádusaid, mat leat viidábut go láhkaásahus addojuvvon njukčamánus 2020, juos fal njoammunsuodjaluslága §§ 1-5 ja 4-1 čuovvovaš eavttut lea devdojuvvon:

Njoammunsuodjalus mii lea lága mielde, galgá vuođđuduvvat čielga medisiidnafágalaš vuođuštussii, leat dárbbašlaš njoammunsuodjalusa várás ja orrut leamen dohkálaš ollislašvuođa árvvoštallama mielde. Go njoammunsuodjalusdoaibmabijut álggahuvvojit, de galgá deattuhovvot eaktodáhtolaš mielváikkuheapmi su bealis geasa dahje sin bealis geaidda doaibmabidju gusto.

§4-1:s čoahkkingildosis, doaimma giddemis, gulahallama ráddjemis, sirremis ja njoammunbuhtisteamis, čujuhuvvo ahte suohkanstivra sáhttá mearridit, go lea dárbbašlaš eastadan dihte dábálašváralaš njoammu dávdda dahje hehtten dihte dan njoammuduvvomis, čuovvovaččat:  

      a)gieldit čoahkkimiid ja čoahkkanemiid dahje ásahit eará gáržžidemiid sosiála ovttastallamiidda juohke sajis gos olbmot leat čoahkkanan
      d)sirret olbmuid geográfalaččat ráddjejuvvon guovlluide dahje eará láhkai gáržžidit sin johtinfriijavuođa gitta čieža beaivvi rádjai háválassii

Hoahppoáššiin sáhttá nappo suohkandoavttir doaimmahit válddi, mii suohkanstivrras lea dán paragráfa mielde.

Gáivuona suohkana delegerennjuolggadusain, mearriduvvon suohkanstivračoahkkimis 27.02.20, lea fápmudus Njoammunsuodjaluslága mielde addojuvvon suohkanváldodoaktárii.

Árvvoštallamat

Vuolláičálli lea ovttasráđiid Gáivuona suohkana gearggusvuođa hoavdagottiin árvvoštallan báikkálaš dilálašvuođaid áigeguovdilis láhkaásahusa ektui mii lea addojuvvon njukčamánus 2020, ja ráđđenvuoigatvuođa ektui mii suohkanis lea Njoammunsuodjaluslága mielde dahkat iežas mearrádusaid lassin láhkaásahusa sisdollui.

Gáivuona suohkana dearvvašvuohtalágádus ii leat mihttodallojuvvon áimmahuššat mearkkašahtti olmmošlassáneami beassážiid ovdal, guovdil ja maŋŋil. Go eatnat olbmot čoahkkanit iešguđetlágan leairraide/čoahkkananbáikkiide, de lea jáhkehahtti ahte njoammudeapmi lassána sakkarat.

Maŋŋilgo lea ollislaččat árvvoštallan dárbbu atnit dohkálaš doaibmannávccaid suohkana dearvvašvuohtabálvalusas, ja atnit maid dárbbašlaš fuola njoammunsuodjalusas, de lea suohkanváldodoavttir mearridan ahte láhkaásahus gildosis orodeames astoáigeopmodagain maiddái galgá siskkildit gildosa idjadeames viessovovnnain, viessovovnnain main lea spiikkártealtá, tealtáleairrain ja eará bissovaš ja sirddašahtti ássanovttadagain báikkiin gos olbmos ii leat su álbmotregistrerejuvvon čujuhus.  

Gielddus guoská olles Gáivuona suohkanii, maiddái duoddarii, guollejávrriide, bisánansajiide jna.

Dát mearkkaša ahte ii leat lohpi idjadit viessovovnnain, viessovovnnain main lea spiikkártealtá, tealtáleairrain ja eará bissovaš ja sirddašahtti ássanovttadagain, olbmuin geat eai leat registrerejuvvon Gáivuona suohkana ássin.

Gielddus ii gusto registrerejuvvon ealáhusdoaimmaide main leat idjadansajit Gáivuona suohkanis Kåfjord kommune Kaivuonon komuuni.

Lea lohpi idjadit barttain dahje viessovovnnain, viessovovnnain main lea spiikkártealtá, tealtáleairrain ja eará bissovaš ja sirddašahtti ássanovttadagain olbmuin geain lea sin álbmotregistrerejuvvon čujuhus Gáivuonas, muhto sii ávžžuhuvvojit garvit stuorát sosiála čoahkkanemiid, earret lagaš olbmuid/bearatgotti, main leat eambbo go vihtta olbmo.   

Mearrádus

Maŋŋilgo ollislaččat lea árvvoštallan dárbbu atnit dohkálaš doaibmannávccaid suohkana dearvvašvuohtabálvalusas, ja maid atnit dárbbašlaš fuola njoammunsuodjalusas, de lea suohkanváldodoavttir mearridan ahte láhkaásahus gildosis orodeames astoáigeopmodagain maiddái galgá siskkildit gildosa idjadeames viessovovnnain, viessovovnnain main lea spiikkártealtá, tealtáleairrain ja eará bissovaš ja sirddašahtti ássanovttadagain báikkiin gos olbmos ii leat su álbmotregistrerejuvvon čujuhus.  

Gielddus gusto olles Gáivuona suohkanii, maiddái duoddarii, guollejávrriide, bisánasajiide jna.

Olbmot besset dahkat beaivemohkiid sihkkarastin dihte rusttegiid, juos eai sáhte bearráigeahččat ávdnasiid ja opmodagaid eará láhkai. Áibbas dárbbašlaš máŧasatnin dahje bearráigeahčču mii lea dárbbašlaš heađuštan dihte stuorra ávnnaslaš vahágiid lea lobálaš.

Suohkanváldodoavttir atná, ahte eavttut mat leat addojuvvon Njoammunsuodjaluslágas § 1-5 leat devdojuvvon, ja suohkanváldodoavttir lea doaibmabiju mearridan § 7-2 mielde ja láhkavuođđudan § 4-1, vuosttas lađđasa, bustáva a) mielde, vrd. bustáva d).

Gielddus ii gusto registrerejuvvon ealáhusdoaimmaide main leat idjadansajit Gáivuona suohkanis Kåfjord kommune Kaivuonon komuuni.

Mearrádus gusto lávvardaga 28.03.20 rájes ja bistá vahku. Árvvoštallojuvvo fas ođđasit 03.04.20, galgágo mearrádus jotkojuvvot 7 beaivvi vel.

Mearrádus lea loahpalaš, iige sáhte guoddaluvvot.

Dearvvuođaiguin

Suohkanváldodoavttir, Gáivuona suohkan Kåfjord kommune Kaivuonon komuuni