Maŋimuš jagiid leat eatnasat ja eatnasat geavahišgoahtán luotta mii manna fylkaluotta luoddaearus vai besset Gorsašaldái, Guolášjávrái ja Huortnážii. Olbmot guđđet biillaid báikkiide ja vázzet Suoma alimus várrái man namma lea Halti. Sihke suopmelaččat ja guossit eará riikkain Eurohpás fitnet doppe, earenomážiid geasset. Go lea šaddan nu olu trafihka dohko, de lea dárbu divodit luotta Huortnážii ja maiddai eará báikkiide.
Dál lea Vipps nammasaš máksinvejolašvuohta huksejuvvon luotta vuolimusas, dát lea eaktodáhtolaš fálaldat. Váttisvuohta lea ahte dušše norgalaččat sáhttet geavahit dán. Go dilli lea nu, de sii geat geavahit luotta eanemosat eai sáhte máksit geavaheami ovddas. Gáivuona suohkan háliida hukset máksinvejolašvuođa man buohkat sáhttet geavahit, dainna lágiin oažžu ruđa man sáhttá geavahit divodeapmái, heiveheapmái ja doibmii, bisánansajiide gos gávdnojit hivssegat, dieđut jna. Visot ruđat máksinvejolašvuođas mannet Guolášluotta divodeapmái ja ođasmahttimii.
Vai sihkkarastit ahte luodda divvojuvvo, sáhttá luotta eaiggádeaddji Troms Kraft AS nammasaš fitnodat gáibidit mávssu geavaheami ovddas olgoáibmolága § 4 mielde. Troms Kraft AS lea positiivva ahte Gáivuona suohkan hukse máksinčovdosa vai luodda divvojuvvo.
Suohkan lea erenomážiid iskan vejolašvuođa geavahit Easypark nammasaš fitnodaga máksinčovdosa man omd. Ivgu geavaha Jiehkkejávrri bissánansajis. Easypark čovdosa sáhttet maiddai eará riikka olbmot geavahit ja gávdno omd. Suomas, Ruoŧas, Duiskkas ja 20 eará riikkain.
Easypark geavaha appa mii lea digitála máksičoavddus, dás ii dárbbaš hukset bummaid iige hukset divrras máksinautomáhtaid. Easypark váldá ovddasvástádusa galbbaid ráhkadeamis ja diehtojuohkimis. Gáivuona suohkan iige dárbbaš máksit maidege fálaldagas. Easypark váldá unna oasáža juohke reaidaruhtageavaheamis vai ruhtadit fálaldaga.
Gáivuonvákki luoddaerrui huksejuvvo avádat mii manná gitta Huortnáža bisánansadjái. Go šaddá nu, de ferte máksit vai beassát dohko. Muđui beassá vánddardit nuvttá. Evttohuvvo ahte ferte máksit juohke jándora ja ahte šaddá vejolašvuohta oastit jahkekoartta. Evttohuvvo maid ahte ferte máksit liigedivada jus vajálduhtte máksit.
Eananeaiggádat ja ealáhusdoallit eai dárbbaš máksit divada guovlluin gos ođđa ortnet čuohcá.
Gáivuona suohkan eavttuha dáid hattiid:
Jándorkoarta 100,- .
Jahkekoarta 300,- .
Lasáhus liigevuojána ovddas 100,- .
Liigedivat jus vajálduhtte máksit 600,- .
Evttohuvvo ahte máksinčoavddus gusto ovtta biilla galbanummárii. Jus háliida geavahit eanet vuojániid, de ferte oastit jándor-/ jahkekoarttaid daidda maid. Evttohuvvo maid ahte ii galgga dárbbašit máksit olles hatti liigevuojániid ovddas, muhto oažžu rabáhta. Ferte maid árvvoštallojuvvot galgá go šaddat vejolaš oastit bearaš- dahje dállodoallokoarttaid, dahje mot čoavdit dán.
Árvvoštallojuvvo ahte máksinčoavddus galgá gustot dáid báikkiide (geahča kárttas dás vuolleleappos)
- Guolášluottas, Gáivuonvákki fylkaluotta luoddaearus. Avádat manná Huortnáža luoddaearu bisánansadjái.
- Eará bisánanavádagat suohkanis gos orru leamen dárbu.
Gáivuona suohkan háliida ruovttoluottadieđuid erenomážiid dáin áššiin:
- Gos hukset bisánanavádagaid ja mot ráddjet daid?
- Jandor- jahkekoarttaid hattit?
- Galgá go ásahit bearaš- dállodoallokoarttaid?
- Lea go dárbu ásahit máksinčovdosiid eará báikkiide vai sihkkarastit bajásdoallama?
Gulaskuddanáigemearri lea cuoŋománu 2.b 2021
Lea vejolaš sáddet evttohusaid elektrovnnalaččat čujuhussii postmottak@kafjord.kommune.no dahje reive bokte Gáivuona suohkan, boastaboksa 47, 9146 Dálusvággi.
Sáhttá maid buktit evttohusaid skovvái dás vuolleleappos.
