Norggas leat dán rádjai badjel 121 000 olbmo boahkuhuvvon Astra Zeneca nammasaš boahkuin. Gáivuonas eai leat nu ollugat, sullii 50-60 olbmo, ja eanaš dearvvasvuođabargit leat boahkuhuvvon dainna. Norga lea orustan boahkuheami Astra Zeneca nammasaš boahkuin go lea guorahallame leat go njeallje olbmo buohccán dás, dahje leat go eará sivat dasa.

Olles máilmmis leat máŋga miljovnna olbmo boahkuhuvvon dáinna, hárve leat raporterejuvvon duođalaš oalgeváikkuhusat boahkuheamis. Dán rádjai eai leat boahtán raporttat mat konkluderejit ahte leat eanet oalgeváikkuhusat go dábálaččat.  Ráđđehus váldá dán ášši hui duođalaččat ja dat čájehuvvo go bisseha boahkuheami dássážii go bohtet vástádusat guorahallamis.  

Maŋŋel boahkuheami Astra Zeneca boahkuin, de ožžot eatnasat juogalágan oalgeváikkuhusa. Lea dábálaš ahte lea nu, ja lávejit leat garraseamos oalgeváikkuhusat vuosttáš dosas. Nuorat ožžot garraseabbo oalgeváikkuhusaid go boarrásat

Dás vuollelis oainnát dábáleamos oalgeváikkuhusat, eatnasat ožžot unnimusat ovtta maŋŋel boahkuheami:  

  • Bávččas gos lea čuggejuvvon
  • Oaivebávččas
  • Nahkárat, šliettas
  • Deahkke- ja lađasbávččas
  • Váibmogákkahat dahje illáveaje  
  • Feber dahje galbmot  
  • Váibmogákkahat

Álbmotdearvvasvuođainstituhtta lea bivdán sin geat leat boahkuhuvvon Astra Zeneca boahkuin čuovvut mielde erenomážiid dáin dávdamearkkain:

  • Garra buozalmas dovdu (omd. bistevaš oaivebávččas, gorutbávččas mii bistá guhkit go golbma beaivvi).
  • Čilgemeahttun sáhpadasat dahje smávva rukses/alitrukses čuoggát mat eai jávket go deaddá daidda lásiin.
  • Dávdamearkkat gáldnanvihkái dahje eará duođalaš buozalmasvuhtii.   
  • Vuorddekeahtes garra-, dahje dávdamearkkat mat bistet guhká ja mas jáhkat ahte lea boahkuheami geažil.

Jus leat boahkuhuvvon Astra Zeneca boahkuin ja vásihat dákkár dávdamearkkaid, de válddat oktavuođa doaktáriin vai váldá iskosa seammá beaivvi.

Dii geat lehpet ožžon vuosttáš dosa Astra Zeneca boahkuin ehpet oažžu dan nuppi ovdalgo fágaeisseválddiid guorahallamiin boahtá konklušuvdna. Stuora- Britannia guorahallamiin boahtá ovdan ahte vuosttáš dosa suodjala bures covid-19 vuostá moadde vahku, erenomážiid duođalaš dávddaid vuostá.

Jus leat ožžon diimmu boahkuheapmái Astra Zeneca boahkuin dán vahku, de oažžut dieđu maŋimuštá gaskavahku jus boahkuheapmi šluhttejuvvo. Jus it gula maidege, de lea ráđđehus mearridan ahte ii leat váralaš boahkuhit dainna ja lea álgán geavahit dan fas. Don manat boahkuheapmái nu go šihttojuvvon.

Jus mearriduvvo ahte galget heitet geavaheame dáid boahkuid, de leat vuordinlisttus ovttas earáiguin. Mii vuoruhit boahkuhit boarrásepmosiid álggus, nu ahte soaittát fertet vuordit veahá ovdal go lea du vuorru boahkuhuvvot.

                                                                           

Ustitlaš dearvvuođaiguin

Anita Monsen Pedersen                                                                                                         
Gáivuona suohkana váldodoavttir