Sámediggi dieđiha:
Juohke jagi 43. vahku mii fuomášuhttit váibmogielaideamet eanet go muđui dahkat. Dán jagi gahččá 43. vahkku golggotmánu 24.–30. beivviide. Dákko bokte bovde Sámediggi sihke priváhtta ja almmolaš aktevrraid searvat Giellavahku ja sámegielaid oainnusmahttimii.
Sámegielat
Gielat eai leat dehálaččat dušše gulahallamii, muhto maiddái olbmo identitehttii, kulturárbái ja gullevašvuhtii. Olles Sámi ássanguovllus leat 10 sámegiela ja riikkaidgaskasaččat leat buot sámegielat kategoriserejuvvon áitojuvvon, sakka áitojuvvon dahje measta jávkan giellan.
Vaikko leat áitojuvvon jávkamis, de sámegielat ain bissot. Doaivva lea. Sámiid gaskkas lea dihtomielalašvuohta gillii ja giellaválljemii. Guovlluin gos sámegiella ii leat geavahuvvon sohkabuolvva dahje guovtti áiggi, de váldet dál nuorra rávisolbmot sámegiela ruovttoluotta ja geahččalit addit dan viidáseappot mánáidasaset. Ođđa sámegielat sohkabuolva sámegielat mánáiguin bajásšaddá dál.Sámegielaid oainnusmahttin lea dán oktavuođas hirbmat dehálaš. Beroštupmi sámi servodahkii ja gillii lea stuoris, ja áigi goas veahkkálaga áŋgiruššatsámegielaid ovdii, ii sáhtášii leat buoret.
Giellavahkku – Giellavahkko - Gïelevåhkoe
Giellavahkku lea veahkkálasbargu oainnusmahttit sámegielaid ja loktet máhtu daid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid. Ovttas mii váldit stuorit ovddasvástádusa sámegielaid gullomis, oidnomis ja geavaheames buot servodatsurggiin.
Giellavahku ulbmil lea loktet sámegielaid stáhtusa ja buoridit máhtu sámi gielas ja kultuvrras olles servodagas. Giellavahkku lágiduvvui vuosttaš geardde jagi 2019 ja lea dan rájes viidon jagis jahkái. Dán vahku lágiduvvojit sihke digitála ja báikkálaš doaimmat miehtá riikka. Ovttasbarggus Ruoŧa ja Suoma Sámedikkiiguin, lágiduvvo Giellavahkku maiddái Ruoŧas ja Suomas. Mii sávvat ahte buohkat servet oktasaš áŋgiruššamii fuomášuhttit sámegielaid iešguđetlágan doaimmaid bokte, sihke báikkálaččat,regionálalaččat ja našuvnnalaččat.
Váldde oktavuođa e-boastta bokte jus leat gažaldagat: giellavahkku@samediggi.no.
Searvva fal don maid sámegielaid loktemii!
