Gáivuona suohkana almmolaš luohti- gulaskuddan eará heivvolaš luđiid birra ovdal 31.3.24

Mun háliidan guovddášbellodaga suohkanstivrajoavkku bealis ovddidit ođđa ášši suohkanstivrii 18.12.2023.Nu go oallugat dihtet, de lea Herman Rundberg dahkan luođi Gáivutnii. Luohti almmuhuvvui vuosttáš geardde Riddu Riđđu festiválas, ja gávdno dál ollu rávdnjenarenain Manne artistanama vuolde. Gáivuona guovddášbellodaga bealis lea riekta ahte suohkan mearrida dán luođi dohkkehuvvot Gáivuona almmolaš luohtin. Gáivuotna lea Romssa kultursuohkan, ja mii leat njunnošis 19 suohkaniin riikadásis. Gáivuona guovddášbellodat oaivvilda ahte lea hui deaŧalaš ahte mii loktet ja deattuhit min kulturguddiid. Herman Rundberg lea riegádan ja šaddan bajás Gáivuonas, ja lea leamašan oassin Violet Road nammasaš joavkkus, ja lea leamaš mielde ollu deaŧalaš našuvnnalaš kulturprošeavttain. Lea hui stuorrá gudni ahte lea dahkan luođi Gáivutnii, ja čájeha gos artisttas lea váibmu. Ovdalaččas lea Gáivuona suohkanis iežas almmolaš lávlla man namma lea «min sang til Kåfjord», man Idar Kristiansen lea ráhkadan. Mii oaivvildit ahte lea riekta ahte mis maiddai lea almmolaš luohti. Mii leat čielggadan ášši Herman Rundbergain, su mielas lea buorre jurdda, ja lea áibbas mielas dasa ahte suohkan dohkkeha dán almmolaš luohtin.

Dearvvuođat 

Svein O. Leiros

1. Gáivuona suohkanstivra mielas lea juoigan deaŧalaš kulturmearka min suohkanis. Juoigan ipmirduvvui guhká suddun mišunerema ja dáruiduhttima čađa. Dál geavahit nuorra musihkkarat juoigama dávjjibut ja dávjjibut. Lágideamit nugo Riddu Riđđu festivála leat veahkehan čalmmustahttit juoigama ja luđiid. Nugo eará mearrasámi guovlluin, de lea oalle sihkkar ahte juoigan lea geavahuvvon Gáivuonas maiddai. Dušše oasit dán dološ árbevierus lea dovdosat. Lea hui positiivvalaš ášši ahte juoigan fas oažžu stuorát saji aktiivvalaš kulturmearkan maiddai Gáivuonas.

2. Gáivuona suohkanstivra lea hui rámis dása ahte Herman Rundberg lea dahkan luođi Gáivutnii, ja  oaivvilda ahte lea sajis ahte Gáivuona suohkan lea iežas almmolaš luohti, ja lea intenšuvdna mearridit dán suohkanstivračoahkkimis geassemánu 2024.

3. Gáivuona suohkanstivra bivdá ássiid buktit ovdan cealkámušaid suohkanii eará heivvolaš luđiid birra. Áigemearri buktit cealkámušaid lea 31.10.2024.